Densaýlyq saqtaý mınıstrligi ambýlatorııalyq dári-dármekpen qamtamasyz etýdiń jańa tetigin engizýge kiristi. Naqtylasaq, dárilerdi birlesip tóleý júıesi iske qosylady. Qanatqaqty joba bıyl Astana qalasynda bastalyp, qoldanystaǵy tegin dári-dármekpen qamtamasyz etý júıesin tolyqtyrady, dep jazady Egemen.kz.
Jańa tetik qoldanystaǵy tegin resept arqyly dári alý tártibin ózgertpeıdi. Turǵyndar burynǵydaı kepildendirilgen tegin medısınalyq kómek kólemi sheńberinde dári-dármekterin aqysyz ala alady. Munda pasıentterge birlesip tóleý júıesine qatysýshy dárihanalardan preparatty tańdaý múmkindigi beriledi. Osy kezde de tegin dári alý quqyǵy saqtalady. Birlesip tóleý tetigi pasıentterge óz betinshe sheshim qabyldaýǵa múmkindik beredi. Iаǵnı, dárini tegin alýdan bólek, zamanaýı preparatty tańdaýǵa múmkindik bar. Tipti, keıbir pereparattardyń qunynyń bir bóligin óz esebinen tóleı alady.
Tólem mólsheri – halyqaralyq patenttelmegen ataýy boıynsha belgilengen shekti baǵa men tańdalǵan preparat qunynyń aıyrmashylyǵy sheginde júrgiziledi. Birinshi kezeńde ózgeris «arterııalyq gıpertenzııa» aýrýy boıynsha engiziledi. Sebebi byltyr ambýlatorııalyq dári-dármekpen qamtamasyz etý aıasynda 3,3 mıllıon pasıent dári alsa, onyń ishinde 1,2 mıllıony arterııalyq gıpertenzııamen aýyratyndar bolǵan.
Tólemdi «eGov» mobıldi qosymshasyndaǵy «Áleýmettik ámııan» servısi arqyly, QR-kody bar elektrondy resept negizinde jasaýǵa bolady. Pılottyq joba ambýlatorııalyq dári-dármekpen qamtamasyz etýge arnalǵan Mindetti áleýmettik medısınalyq saqtandyrý qorynyń bekitilgen bıýdjeti sheginde júrgiziledi.
Birlesip tóleý tetiginiń negizgi maqsaty – emsharalardy jaqsartýǵa jáne aýrý asqynýlaryn, múgedektik pen ólim-jitimdi azaıtýǵa baǵyttalǵan. Birlesip tóleý júıesi – múmkindikti shektemeıdi, kerisinshe keńeıtedi. Pasıentke tańdaý erkindigin berip, dári-dármekpen qamtamasyz etý júıesiniń ıkemdiligi men ashyqtyǵyn arttyrady.